Damen 4.Liga – VBC Schwarzenburg vs. VBC Riggisberg

U de ischs wieder sowit gsi u mir hei üsese Regioneduell gägä VBC Riggisberg gha. Us Erfahrig heimer da immer ä rächt knappi Sach gägägnang u das isch oh hüt nid angers gsi.

Dr erst Satz het scho zimli knapp agfange u es isch sehr usgliche gsi. Mau hei mir d Nase vore gha u mau Riggisberg. Am Schluss het sech leider Riggisberg chönne düresetze u dr Satz mit 23:25 für sich entscheide. Im zwöite Satz hets uf üsere Site super klappet u es isch üs eifach gloffe, drum heimer de Satz mit 25:16 gwunne. Im 3. Satz ischs wieder viu enger worde u beidi Teams hei dä Satz unbedingt wöue gwinne. Dis mau isch zGlück uf üsere Site gsi u mir heine mit 25:22 chönne heitue. Eis Punkt isch fang gsicheret gsi, aber mir hei natürlech gern 3 Pünkt wöue hole. Zudem isch d’Glägeheit da gsi, für üse 5. Satz-Fluech zbeende.

U ner isch dr Fight ersch richtig los gange. Beidi Teams hei um jede Bau kämpft u zersch het Riggisberg ä Satzbau gha u ner hei mir d Glägeheit gha, dä Satz u di drü Pünkt heiztue. Leider aber het das nid klappet u mir hei de üsserst knapp Satz a Riggisberg müesse abgäh mit 27:29. Dr Fluech vo de 5.Sätz isch leider ging no nid besiegt.

Im 5. Satz heimer zwar immer no kämpft, aber me het de gmerkt, das 5 vo de 6 Spielerinne ufem Fäud ihre 5. Satz spiele…U so hets leider am Schluss nid ganz glängt u de heimer mit 10:15 de 5.Satz verlore.

Sicher isches für üs sehr ärgerlech gsi, heimer zum 4. Mau i dere Saison im 5. Satz verlore. Aber grundsätzlich isches es super Spiu gsi u mir hei ändlech wieder mau Volleybau gspiut. So fägts Froue!